सुरु भयो पहिलो हिमालयन रिम क्षेत्रीय फिल्म प्रदर्शनी

काठमाडौं । पहिलो हिमालयन रिम क्षेत्रीय फिल्म प्रदर्शनी आजदेखि काठमाडौंमा सुरु भएको छ । त्रिभुवन विश्वविद्यालयमा ‘२०२५ प्रथम हिमालयन रिम क्षेत्रीय फिल्म प्रदर्शनी’को औपचारिक सुरुवात गरिएको हो ।

‘सभ्यताबीच आपसी सिकाइ, प्रविधिगत नवप्रवर्तन’ भन्ने नारासहित आयोजना गरिएको यस प्रदर्शनीमा एनिमेटेड फिल्म प्रदर्शन, हस्तकला कार्यशाला, सांस्कृतिक तथा सिर्जनात्मक प्रदर्शनी र सिनेम्याटिक संवादजस्ता विविध कार्यक्रम समेटिएका छन्।
परम्परागत चिनियाँ संस्कृतिलाई आधुनिक प्रविधिसँग संयोजन गरेर प्रस्तुत गरिएका श्रव्य–दृश्य सामग्रीले नेपाली युवा विद्यार्थीहरूलाई विशेष रूपमा आकर्षित गरेको देखिन्थ्यो।

कार्यक्रमको उद्घाटन एआई (कृत्रिम बुद्धिमत्ता) द्वारा निर्माण गरिएको प्रवर्द्धनात्मक छोटो चलचित्रबाट गरिएको थियो। त्यसपछि एआईजीसी (AI-Generated Content) प्रविधिबाट पूर्ण रूपमा तयार गरिएको एनिमेटेड छोटो चलचित्रद स्पिरिट अफ द माउन्टेन्स प्रदर्शन गरियो। चिनियाँ अमूर्त सांस्कृतिक सम्पदा ‘छ्वानसिङ तुओ’ (पूर्ण-आकार रबिङ) प्रविधिबाट प्रेरित यस चलचित्रले परम्परागत संस्कृतिसँग कृत्रिम बुद्धिमत्ताको अनौठो संयोजन प्रस्तुत गरेको थियो।

प्रदर्शनपछि चलचित्रका निर्देशक पाङ जियाले भिडियो लिंकमार्फत प्रत्यक्ष रूपमा एआई दृश्य–निर्माण प्रक्रियाको प्रदर्शन गरे। निर्माता जुन्यान हुआङले पनि विद्यार्थीहरूसँग अन्तरक्रियात्मक प्रश्न–उत्तर सत्रमा सहभागी भई दर्शकहरूलाई चकित पारे।

आजको प्रदर्शनमा कलाकार तथा फिल्मकर्मी अनिल यादव, बुद्धि तामाङ, पवित्रा शंकी, केपी पाठक तथा प्राध्यापक कुन्दन आर्याललगायतको उपस्थिति थियो । सहभागी कलाकार, प्राध्यापक र विद्यार्थीहरूबीच चलचित्र, संस्कृति र प्रविधिका विषयमा जीवन्त छलफलसमेत भएको थियो।

दिउँसोको सत्रमा एनिमेटेड फिल्मद लिजेन्ड अफ हेइ २प्रदर्शन गरियो, जसले ठूलो संख्यामा विद्यार्थीहरूको ध्यान तानेको थियो। यस चलचित्रले आफ्नो विशेष डायनामिक स्टोरीबोर्ड प्रि–भिजुअलाइजेसन प्रविधिमार्फत मानव र ‘दानव’-पहाड, पानी, काठ, ढुंगा र जनावरका प्रतीकात्मक पात्रहरू-बीचको सहअस्तित्वको हृदयस्पर्शी कथा प्रस्तुत गर्छ। प्रकृति र मानवको एकता तथा सबै जीवको सहअस्तित्व भन्ने पारिस्थितिक सन्देशले दर्शकलाई गहिरो रूपमा प्रभावित बनाएको थियो।

त्यसपछि आयोजना गरिएको ‘ब्लाइन्ड बक्स इन्टरएक्सन’ कार्यक्रमले माहोललाई चरमोत्कर्षमा पुर्यातयो, जहाँ विद्यार्थीहरूले प्रश्नावली र विभिन्न गतिविधिमा सहभागी भई सीमित संस्करणका चलचित्र सामग्री जित्न उत्साहपूर्वक भाग लिए।

त्रिभुवन विश्वविद्यालयमा सम्पन्न यस भ्रमणशील प्रदर्शनीको पहिलो चरणलाई शिक्षक र विद्यार्थीहरूले व्यापक रूपमा स्वागत गरेका छन्। धेरै विद्यार्थीहरूले चलचित्र प्रदर्शन र अनुभव आदान–प्रदानका सत्रमार्फत चिनियाँ एनिमेसनको विशिष्ट सौन्दर्यशास्त्र र उत्कृष्ट निर्माण प्रविधि नजिकबाट बुझ्न पाएको प्रतिक्रिया दिएका छन्। साथै, डिजिटल सिर्जनाको क्षेत्रमा द्विपक्षीय सहकार्यका सम्भावनाप्रति उनीहरू आशावादी देखिएका छन्।

हिमाली क्षेत्रमा आयोजित यो पहिलो छवि–आधारित सांस्कृतिक आदान–प्रदान कार्यक्रम रहेको आयोजकहरूले बताएका छन्। यो प्रदर्शनी आगामी दिनमा काठमाडौं विश्वविद्यालय (KU) र लुम्बिनी बौद्ध विश्वविद्यालयमा पनि आयोजना गरिनेछ, जसले चीन र नेपालबीच मात्र नभई सम्पूर्ण हिमालयन क्षेत्रमै सांस्कृतिक अन्तरक्रिया र आपसी समझदारीलाई थप सुदृढ बनाउने अपेक्षा गरिएको छ।